యూకేలో మాస్టర్స్ డిగ్రీ చేసేందుకు రావొద్దు... ఓ భారతీయ మహిళ పోస్టు వైరల్

బ్రిటన్‌లో ఉన్నత విద్యను అభ్యసించి, అక్కడే ఉజ్వల భవిష్యత్తును నిర్మించుకోవాలని ఆశించే భారతీయ విద్యార్థులకు లండన్‌కు చెందిన ఓ భారతీయ నిపుణురాలు తీవ్ర హెచ్చరిక జారీ చేశారు. యూకేలో మాస్టర్స్ డిగ్రీ పూర్తి చేసిన తర్వాత ఉద్యోగ అవకాశాలు చాలా తక్కువగా ఉన్నాయని, తనతో పాటు చదివిన వారిలో దాదాపు 90 శాతం మంది ఉద్యోగాలు దొరక్క స్వదేశాలకు తిరిగి వెళ్లాల్సి వచ్చిందని ఆమె ఆవేదన వ్యక్తం చేశారు.

భారత్‌లో బ్యాచిలర్ డిగ్రీ పూర్తి చేసి, పోస్ట్ గ్రాడ్యుయేషన్ కోసం యూకే వెళ్లిన మార్కెటింగ్ నిపుణురాలు జాన్వీ జైన్, అక్కడి క్షేత్రస్థాయి పరిస్థితులను వివరిస్తూ 'ఎక్స్' (ట్విట్టర్) లో ఒక పోస్ట్ ద్వారా తన అనుభవాలను పంచుకున్నారు. "యూకేలో ఉద్యోగాలు లేవు. మాస్టర్స్ కోసం ఇక్కడికి రావాలని ఆలోచిస్తున్న అనేక మంది నాకు సందేశాలు పంపుతున్నారు. వారికి నేను చెప్పేది ఒకటే, ఇక్కడికి రావద్దు. నా బ్యాచ్‌లోని 90 శాతం మంది ఉద్యోగాలు లేక వెనక్కి వెళ్లిపోవాల్సి వచ్చింది. మీ దగ్గర వృధా చేయడానికి డబ్బు ఉంటే తప్ప, దీని గురించి ఆలోచించవద్దు. యూకేలో ఉద్యోగం సంపాదించడం ఎంతో కష్టంగా మారింది" అని జాన్వీ తన పోస్ట్‌లో స్పష్టం చేశారు.

తాను అదృష్టవశాత్తూ ఉద్యోగం సంపాదించగలిగానని, అయితే ఇది చాలా అరుదుగా జరిగే విషయమని ఆమె పేర్కొన్నారు. గతంలో పరిస్థితి ఇంత దారుణంగా ఉండేది కాదని, అంతర్జాతీయ విద్యార్థులలో సుమారు 60 నుంచి 70 శాతం మంది గ్రాడ్యుయేషన్ తర్వాత ఉద్యోగాలు సంపాదించుకోగలిగేవారని ఆమె గుర్తుచేశారు. అయితే, ప్రస్తుతం కఠినతరంగా మారిన ఉద్యోగ మార్కెట్, వీసా నిబంధనలు, కంపెనీలు వర్క్ పర్మిట్లను స్పాన్సర్ చేయడానికి వెనుకాడటం వంటి కారణాలతో పరిస్థితి పూర్తిగా మారిపోయిందని ఆమె తెలిపారు.

జాన్వీ జైన్ చేసిన ఈ పోస్ట్ సోషల్ మీడియాలో విస్తృతంగా చర్చనీయాంశమైంది. పలువురు యూజర్లు యూకేతో పాటు ఇతర యూరోపియన్ దేశాల్లో కూడా అంతర్జాతీయ విద్యార్థులు ఎదుర్కొంటున్న ఇబ్బందులను ప్రస్తావించారు. "యూరోపియన్ యూనియన్‌లో మాస్టర్స్ డిగ్రీ చేయడం, అక్కడ జీవితాన్ని నిర్మించుకోవడం ఈ రోజుల్లో చాలా భిన్నంగా ఉంది. పెరుగుతున్న జీవన వ్యయం, పరిమిత ఉద్యోగావకాశాలు, తీవ్రమైన పోటీ గతంలో కంటే ఎక్కువ సవాళ్లను విసురుతున్నాయి. ఒకప్పుడు యూకేకి వెళ్లడం ఉజ్వల భవిష్యత్తుకు సోపానంగా భావించేవారు. యూరోపియన్ యూనియన్, యూకేలోని నా స్నేహితులు చాలా మంది ఇబ్బందులు ఎదుర్కొంటున్నారు, కొందరు భారత్‌కు కూడా తిరిగి వచ్చారు" అని ఒక యూజర్ వ్యాఖ్యానించారు.

మరో యూజర్, "నిజాయతీగా చెప్పినందుకు ధన్యవాదాలు. ముందడుగు వేసే ముందు నష్టాలను తీవ్రంగా అంచనా వేయడం అవసరం" అని పేర్కొన్నారు. "ఇది 100 శాతం నిజం. నా స్నేహితురాలు కూడా ఇదే చెప్పింది. ఆమె బ్యాచ్‌లో చాలా మంది ఉద్యోగం సంపాదించడంలో విఫలమై వెనక్కి వచ్చేశారు" అని ఇంకొక యూజర్ రాశారు.